डॉ श्री नानासाहेब धर्माधिकारी प्रतिष्ठानचे अध्यक्ष डॉ श्री आप्पासाहेब धर्माधिकारी व श्री सचिनदादा धर्माधिकारी यांच्या मार्गदर्शनाखाली उपक्रम; श्री सदस्यांसह शासकीय अधिकारी व लोकप्रतिनिधींचा सहभाग
प्रतिनिधी संदीप लाड
श्रीवर्धन : पाणीटंचाईवर मात करण्यासाठी आणि पावसाचे वाहून जाणारे पाणी अडवून त्याचा उपयोग जलसंधारणासाठी व्हावा, या उद्देशाने मौजे भोस्ते व शेखाडी येथे महाराष्ट्रभूषण डॉ. नानासाहेब धर्माधिकारी प्रतिष्ठानच्या वतीने वनराई बंधाऱ्यांची उभारणी करण्यात आली. प्रतिष्ठानचे अध्यक्ष डॉ आप्पासाहेब धर्माधिकारी व सचिनदादा धर्माधिकारी यांच्या मार्गदर्शनाखाली हा उपक्रम राबविण्यात आला. या उपक्रमामुळे जलसंधारणाला चालना मिळण्यास मदत होणार असून, पाणी संवर्धनाचा महत्त्वपूर्ण संदेश देण्यात आला आहे.
डॉ. नानासाहेब धर्माधिकारी प्रतिष्ठानच्या माध्यमातून सामाजिक बांधिलकी जपत विविध समाजोपयोगी उपक्रम राबविले जातात. त्याचाच एक भाग म्हणून भोस्ते व शेखाडी येथे वनराई बंधाऱ्यांची उभारणी करण्यात आली. या उपक्रमात श्री सदस्यांनी उत्स्फूर्त सहभाग नोंदवत श्रमदान केले. तसेच शासकीय अधिकारी व लोकप्रतिनिधींनीही सहभाग घेत या सामाजिक उपक्रमाला सहकार्य केले.
वनराई बंधाऱ्यांमुळे पावसाचे वाहून जाणारे पाणी अडविण्यास मदत होते. परिणामी, जमिनीतील ओलावा टिकवून ठेवणे, भूजलपातळी वाढण्यास हातभार लावणे आणि स्थानिक पातळीवर पाण्याची उपलब्धता सुधारण्याच्या दृष्टीने अशा उपक्रमांचे महत्त्व मोठे आहे.
आजच्या काळात पाणीटंचाई, अनियमित पाऊस आणि घटती भूजलपातळी या समस्या गंभीर होत असताना जलसंधारणासाठी लोकसहभागातून राबविण्यात येणारे उपक्रम काळाची गरज बनले आहेत. डॉ आप्पासाहेब धर्माधिकारी व सचिनदादा धर्माधिकारी यांच्या मार्गदर्शनाखाली राबविण्यात आलेला हा उपक्रम पर्यावरण संवर्धन आणि जलसंधारणाच्या दृष्टीने स्तुत्य ठरत आहे.
श्री सदस्य, शासकीय अधिकारी आणि लोकप्रतिनिधी यांच्या सहभागातून उभारण्यात आलेल्या वनराई बंधाऱ्यांमुळे ‘पाणी अडवा, पाणी जिरवा’ या संकल्पनेला बळ मिळणार असून, जलसंधारणाबाबत जनजागृती होण्यासही मदत होणार आहे.
